//本Page Patreon經已開通，請訂閱支持本Page運作，謝謝！ 連結： https://bit.ly/2TvzIaF //
4月18日多為飯民大老被捕，民間記者會出Post叫抗爭者「歸隊」──其實睇見呢個Post我已極之反感：之前一直有前線義士被捕被迫害嘅新聞，點解果陣你唔叫歸隊？係咪大台代表條命特別矜貴啲？又乜之前條隊散咗咩？之前咁多次悼念活動果班人唔通脫咗隊？仲有點樣「歸隊」？你究竟係想吹雞叫抗爭者回歸前線，定係暗示大家歸飯民大台條隊，齊齊9月幫佢地抬轎？
但我當然知道呢個「民間記者會發佈中心」係特登寫得咁含糊，等你揪唔倒佢小辮子；但自從佢地響3月28日公佈咗一個完全無提供統計方法嘅可靠性、響短短幾日間就搞成嘅「13萬民意調查」之後，近呢兩三個禮拜就係不停推動功能組別選民報名，但點樣看待李國麟莫乃光梁繼昌呢啲贊成通過水炮車撥款嘅抗爭叛徒嘅連任問題，卻係粒聲唔出。
然後再去到呢個幾禮拜，所謂「官方民間記者會」更加係變本加厲，開始宣傳飯民經已就初選達成共識，邊個唔參加初選、或者唔服從初選機制邊個就係鬼，一定唔可以投。
睇到呢度我真係呆撚咗。即係如果「民間記者會」只係一個飯民嘅衛星組織，只係作為飯民大台嘅喉舌，咁都「情有可願」。喂，但你而家係掛住「民間記者會」個朵喎，乜而家抗爭者之間除咗「光時五缺」呢個共識之外，突然多咗一項「邊個唔參加初選邊個就係鬼」呢條新規則出黎？
好簡單，假設有位勇武義士，佢覺得而家呢班飯民同偽本土參選人都代表唔倒佢，亦唔信任初選機制，於是決定獨立出黎參選，咁響你班「民間記者會」騎劫者眼中，係咪即係佢地就係鬼，而你地就會公開呼籲所有人都唔可以投比佢？
呢個當然係一個未出現嘅假設，但卻足以反映出，「民間記者會」一刀切宣佈「唔參加初選=違反抗爭者共識」呢個原則，只係揸住雞毛當令箭。更甚者，「不分化不割席」呢句口號嘅由來，就係源自飯民多番同唔願意跟隨佢地路線嘅青年新政、本民前同埋其他勇武本土劃清界線之餘，仲要老屈佢地收共產黨錢，話黃台仰有50萬現金係形跡可疑，話青年新政可以響中銀開戶口係「共青年新政」，根源就係佢地拒絕同飯民協調；
然後今時今日「民間記者會」又用番同一番手段走去攻擊、抹黑唔肯聽從飯民大台指揮嘅人，究竟邊撚個響度玩分化？咪臭係你「民間記者會」囉！哦，原來「兄弟爬山，各自努力」係廢話黎嘅，只要唔跟飯民大台遊戲規則玩，你就要被割席！
所以我點解成日都話，去到今時今日，根本「不分化不割席」經已成為飯民大台清算異己嘅工具：只要你被打成係「鬼」同「分化撚」，你就可以被割席。都係果句，而家「民間記者會」經已被一班飯民功能組別議助成功騎劫，仲公然幫佢地金主老闆助選，飯民大台經已借屍還魂重新建立，然後一班深黃傻粉如在夢中不特止，仲要掉番轉頭屌9啲質疑「民間記者會」經已變質嘅人係分化撚？
是非黑白顛倒之荒謬，莫過於此
