【媽咪】
小朋友嗌老師做媽咪，
一啲都唔出奇，
佢地成日衝口而出一聲「媽咪~」
其實都幾搞笑😂
我察覺到小朋友係嗌錯老師做媽咪之後，
都會有唔同嘅反應。
反應一：<大方承認型>
有個小朋友經常都會嗌錯老師做媽咪，
當自己發現嗌錯咗之後，
就會一邊抓頭，一邊笑笑口咁話
👦：「哎呀！啱啱嗌錯咗妳做我媽咪…(^_^;)」
每次嗌錯都會講，
仲要講到妳知為止。
反應二：<冷靜思考型>
有一種就係嗌錯咗老師做媽咪之後，
會自己靜咗兩秒，
冷靜思考自己嗌錯咗，
思考完再嗌返啱嘅。
反應三：<無事發生型>
仲有一種就係發現自己嗌錯咗之後，
同樣會靜咗兩秒，
然後扮無事發生過，
轉頭即刻走咗去。
其實仲有一種就係不停嗌錯都唔發覺🙈
不過就少啲會發生，
有時候俾小朋友叫媽咪都幾好玩呀(*´∀`)♪
