美國人養狗，同佢哋養細路一樣，4個字講完：放任縱容。
美國人對佢哋嘅仔女，採取friend過打band, 大家咁高咁大既態度。後果係：啲細路當正自己係「腦細」：冇禮貌，駁嘴，嗌交, 忤逆，目無尊長，鍾意點就點，變成標準「腦死」。
養狗呢？ 一樣咁大鑊，可能再大鑊啲。
係人都知道，狗仔初初帶返屋企，因為啱啱離開媽媽同兄弟姐妹，唔多唔少會有（separation anxiety ）分離焦慮症。狗主人一定要即刻開始訓練佢地，要佢地習慣係自己個籠度瞓覺，藉此提供一個竇俾佢地，等佢地可以有安全感。竇，係所有動物包括人類都需要既庇護所。一開始，狗狗唔習慣，當然會吵，會吠，會喊，甚至成晚發癲唔瞓。但係養得佢地，就要對佢地負責任，要好好管教。所以狗主人一定要同佢地鬥長命，守緊防線，唔可以心軟。只要咬著牙根，忍佢一，兩，三晚，狗狗就會「認命」，接受現實，乖乖喺自己既竇度瞓覺，亦會開始喺自己個竇度得到安全感，冇咁焦慮，從此天下太平。
可惜我遇上啲狗主人，10個有10個都係喺第一晚，就完全崩潰，頂唔順狗狗哭鬧，5分鐘後就已經跪低，成為名符其實既狗奴才，俾佢地上床同自己一起瞓。買咗靚靚，舒適狗籠，變成純裝飾品。
我放狗時同其他狗主人吹水，佢地個個都好羨慕我家金毛仔點解可以咁乖，問我係點訓練佢既。我一開波同佢地講我由day one點訓練金毛仔，佢地就已經咦咦吖吖，好驚嘆我點解可以教到金毛仔第一晚就肯喺籠度瞓覺。我話：呢個係中國人六千年既類積高等智慧：一字記之曰：忍。忍無可忍，再繼續忍。
我見到佢地雖然覺得不可思議，但又唔想成晚冇覺好瞓，不斷叫我分享心得。我心諗：慳啲啦！朋友！你地教細路都教到一鑊泡，更何況係教狗？#養狗 #狗主人 #狗奴才 #狗狗 #狗仔 #訓練 #一字記之日 #忍 #狗籠 #分離焦慮症 #separation anxiety #腦細
