《七夕》
♂：早晨，估唔到你會偷偷地睇我打乜……早知我打返一篇三千字既比你鑒賞下
♀：算吧啦，三句就三句，唔好扮三千字
♂：都係既，有好多野唔需要一日講晒，我決定慢慢同你講，係呢，七夕快樂
♀：你唔講得都唔知今日係七夕，七夕快樂
♂：如果一年先可以見一次，你係呢一日會做乜呢？
♀：等等，你呢條問題既對象係唔係講你先？
♂：就當係我啦
♀：咁我唔答喇，答左你咁見面點搞！
♂：咁你唔好當係我啦，當係你既夢中情人
♀：我唔會做乜喎，睇對方會點做啦
♂：對方會攬住你
♀：咁我都攬下佢
♂：其實兩個人如果一年先見一次，同時深愛住對方既話，真係唔知點做好，或者咩都唔講就係最好既選擇
♀：話唔定佢地承受唔到呢種相思之苦，係見到對方之後，決定以後各行各路呢
♂：如果係要咁既話，我諗我都會放生佢，不過人同神唔同，神有無盡既生命，而人只有幾十年，如果一年只係見一次的話最多咪幾十日……
♀：我突然間諗到！好多人係埋一齊日見夜見，其實都唔係完全陪緊大家，只係係對方身邊，如果一年一次，呢一日全心全意咁同對方一齊的話，聽落都唔係太差姐
♂：記唔記得我地第三日傾過年齡，當時都有講過時間，人就係太長命，覺得自己時間仲有好多，所以唔去珍惜現有既時間
♀：今日……我地係第二十八日？
♂：仲有四日，我就完成到一個月零一日喇
♀：我都無估到我地會傾到咁耐
♂：一個人當有一百歲命，都只係得1200個月，而我地相處到一個月，都已經好難得
♀：就黎完成你既目標，你覺得我地可以傾幾耐？
♂：一世
♀：喂，認真咩
♂：只要你唔消失，我可以同你傾一世
♀：我地既話題，可以傾到一世？
♂：同你一齊，我覺得我地會一直進步，一直有新發現，呢個世界有咁多事，咁多問題，就算一日講一樣都好，我地都講唔晒
♀：有冇聽過，一天只做一件事？
♂：有，呢首歌好舒服，我好鍾意
♀：比你揀一句歌詞，你會揀邊句？當去到下一分鐘，我地一齊打出黎，睇下係咪一樣
♂：喜歡花一天跟你一切是愛
♀：喜歡花一天 跟你一切是愛
♂：哈哈，中！
♀：我知你會揀呢句
♂：我知你想聽呢句
♀：其實，長傾不見呢句野，我同你傾左之後都無再用，我覺得無人可以再比到呢種感覺我
♂：見到你之後，我都無再搵其他人傾喇，無謂浪費其他人時間啦
♀：喂，好開心認識你
♂：我都好慶幸可以認識你
♀：慘喇……以後我嫁唔出的話，你要負責
♂：或者……你會遇到更好呢，講真，我都唔係好優秀既人，世界上大把比我有內涵有外在有深度既存在
♀：係，講唔埋，但第一次就係第一次，至少我會永遠記得你
♂：以前我一直都覺得自己係一隻無腳既雀仔，呢個世界上有好多地方我未去過，有好多人未見過，要我留係一個地方，真係一件好無聊既事……但唔知點解，你令到我返左黎香港，仲令我覺得，留低係呢個地方，呢個有你既地方，係一件唔差既事
♀：你既世界可以好大，唔需要為我而限制自己啊
♂：我有分數，依家moment，你只需要全盤接受我呢份心意就得！
♀：好，咁我只可以講你講聲，多謝
♂：如果我有日要離開，我都會希望每年可以返黎一次，同你見一面
♀：好似牛郎織女咁？
♂：係，我見到你，會好好咁擁抱你
♀：如果我到時結左婚呢？
♂：我唔理你帶埋老公定帶埋你仔女啦，總之你我就攬硬嫁喇！你唔想尷尬就唔好帶佢地出黎喇！
♀：我終於明咩叫男人唔壞女人唔愛，雖然你呢個行為好無賴，但我聽到又真係好鍾意喎！
♂：如果我真係要走，你會點？
♀：你指你依家就要走？
♂：唔係，我指我將來要走
♀：咁將來你再問我
♂：我知你個答案係咩
♀：我唔知你知既答案係咩，但我好清楚你想聽到咩答案，而呢個答案，我係唔會講既
♂：我發現同你真係好似，有冇睇Loki？
♀：死自戀狂，我唔覺得同你有幾似囉，你唔好扮熟！
♂：有冇聽過夫妻相，係由相處之中，兩個相愛既人不知不覺咁去模仿對方而形成
♀：喂喂，仲夫妻相，有冇咁過份啊你，都係個句，見到我你再講啦，依家你講咁多我怕到時收唔返，然後成為你一世既污點！
♂：好好好，我知，再講就over嘛！我都識得停既！好啦，七夕快樂
♀：七夕，對我講其實係一個唔講都唔會記得既節日，但今年既七夕，有你係度，七夕好似唔同左，今日我好快樂，希望你都快樂啦，晚安
♂：我快樂啊，我決定loop住首歌訓，晚安
♀：我已經一路聽緊喇
♂：夫妻相係咪就係咁……都係無野【收回收回】哈哈
♀：收唔返喇你！聽日再傾啦，你差一句野
♂：我好掛住你，你呢？
♀：我咩我，訓！
——
長傾·不見 第一回 @筆友
https://bit.ly/LongchatEP1
長傾·不見 第二十七回 @糖尿
https://bit.ly/LongchatEP27
好久 不見 第一回@久違
https://bit.ly/LongtimeEP1
好久 不見 第五回@認真
https://bit.ly/LongtimeEP5
一天只做一件事 在 蔡潔Jacky on Instagram: “#一天只做一件事#100 前 ... - Pinterest 的美食出口停車場
Jun 15, 2020 - 蔡潔Jacky posted on Instagram: “#一天只做一件事#100 前一陣子才和朋友說，不要被過去的事情牽絆著而影響了現在，但自己也難免會犯這個愚蠢的錯誤。 ... <看更多>