［港紙三年新高最大受益人］技術文。大贏家係我朋友。真的，我朋友。
1. 首先講講，正常人其實應該唔係好覺。港紙對其他外幣就當然強，人人睇到。但呢度指嘅港紙三年新高，係指對美金。
2. 至於其他絶大多數貨幣，甚麼韓WON呀（嗚，五算都嚟緊頭，但冇得拯救韓妹），英鎊呀（八算都見過，然後啲友話貨幣反映實力喎），挪威克朗呀（一個月跌咗兩成幾），澳紙呀（四個幾！我同囡囡結婚渡蜜月時係八蚊！），當然全部對港紙都跌得勁。因為避險嘛，人人渣美金，港紙又好大程度上即係美金。
3. 即係話，美金強，但港紙更強！美金強幾正路，一兵荒馬亂就係咁，都話把口反美嘅中東佬又好，小粉紅又好，左翼右翼乜都好，最信都係美金。唔通渣1010咩
4. 但港紙仲強過美金，就可以講多兩句。我見有評論話因為避險，就差矣。你解到港紙（即係好大程度上係美金）強過其他，但冇可能解到港紙做乜強過美金。總冇理由香港穩陣過美國，好打得打得過真係好打得。
5. 都係嗰句，資產本身唔會話你知點解升點解跌，但要解，問我，咪又係因為拆息咯。
6. 美金拆息LIBOR，一個月就0.93%，三個月就1.20%。香港HIBOR呢？一個月就1.83%，三個月就1.72%。近期幾篇文（主要係收費專欄，課咗金未呀？）都有提LIBOR HIBOR都係美國忽然減息後一厘仲要勁升，十分驚。但呢一刻，你見到港息係高過美息一大截嘅對不？
7. 咁自然，就會有個套利機制，我低息借美金轉做港紙，收高啲息好過。銀行間講緊幾秒鐘幾碼幾碼港紙（一碼十億）咁做，就唔係你嗰啲轉幾皮嘢可比。人人要港紙，自然推升港紙。
8. 類似嘅東西，寫過好多次，對上一次十二月：港紙5年最長升浪，燒到淡龜投降（https://bit.ly/3dlcXzu）。不再自我重覆，只係快講兩點：
第一， 講嘅乜撚港紙爆煲外資切尼外匯儲備唔夠頂存款走晒港元崩潰，從冇出現到。親，港紙升到三年新高呀。難為好多人仲係日講夜講，不如睇下事實？當然，掉轉，你換咗美金，其實唔會有乜損失嘅，7.85 升到 7.75，你都係輸1%啫，「咪撚講到自己唱咗幾億咁啦」
第二， 港紙弱時，有種好常見嘅論調，話咩資金撤出，香港有危機，股票會瀉。同樣道理，你見到根本唔係嗰回事。掉返轉睇，而家港紙咁強，你睇下啲股票如何？係咪資金流入？大佬呀，資金流入唔係幾喼錢嚟掃股票或者索羅斯拎住堆籌碼買股票嘛。在國際銀行體系出出入入，關股票撚事咩
9. 好，講返我朋友，佢先係最大贏家，點解？
10. 諗下，港紙強，香港人，有乜著數？頭先都提咗下啦，你去挪威睇極光咪平咗—但入唔到境。你去韓國拯救韓妹咪可以食貴一個餐—但入到境（好似仲得？）你都唔敢去啦？你去英國做陳思銘交學費咪平咗。同樣道理，你去買咩毛毛鞋UGG呀買英國波衫呀，都應該平咗（但其實聽聞而家啲舖改價改得好快）
11. 但，以上都只係因為美金強。如果港紙仲強過美金，咩人會受惠？就梗係，真係要唱美金嘅人啦
12. 我朋友因乜要唱美金？就說來話長。但簡單嚟講，佢做緊我六年前做嘅嘢（呢句好似好串，但係事實），搞移民台灣！
13. 搞移民台灣因為乜要唱美金？因為投資移民要開公司，要匯六百萬台幣過去。但你在香港轉台幣就死得，匯價極差—正如你去台灣旅行唔會（唔會架可？）在香港唱幾皮嘢。
14. 比較好嘅方法，就係轉咗做美金，匯過去，佢再美金轉台幣。雖然係兩次，但點都好過你在香港轉台幣（＊）。
15. 咁既然佢要轉美金，佢就問我，係咪應該趁而家轉呢？我開頭第一反應，都係叫人唔好time the market，是但隨心啦，咁準發咗達啦。但呢個情況有啲唔同。港紙7.75就封頂的了，對美金應該只會跌唔會升（＊＊）。
16. 咁雖然，個trading range（＊＊＊），7.75 – 7.85，1%—但，朋友個金額大嘛。百五萬港紙喎，點講都唔係細數。咁而家轉定美金，實在冇乜點蝕（＊＊＊＊）。一個唔該遲下去返弱方嘅，1%，慳返萬五蚊喎，請我去澳門食杏仁餅都得啦！
17. 所以雖然顯然而見，但如果係要用美金嘅，大額嘅，例如搞投資移民嘅，梗係而家唱美金。
18. BTW，方丈都要講句，聽聞香港金融管理局 Hong Kong Monetary Authority成日想搵啲網紅KOL（是但啦）寫下嘢，澄清下政策咁。但就奇怪地冇人搵我。唔敢話專家，大把人日日坐緊盤，但你話在寫開嘢嗰堆，我諗我就真係專家。即係，我估我係少數直接同金管局交過手嘅。點交？你就去銀行借錢，我就（代表我銀行）去金管局借錢，see the difference（＊＊＊＊＊）？
（＊）呢度仲有個插曲，我搵返當年啲相，先發現當時我都冇轉做美金匯過去，但我係直接港紙匯過去台灣的！去到佢當然轉咗台幣，個價就…..我都冇睇了。但當時我年青，冇乜前人教我，正路做法都係匯美金的，應該係。
（＊＊）除非廢除聯匯—咁冇話一定冇可能，但首先可能極低，二來，斷估冇乜人覺得廢聯匯後港紙會仲強升穿7.75—如果真係嘅，抵輸錢見證啦。
（＊＊＊）留意呢套嘢都唔係好長歷史，2005年開始，剛剛係我做dealer冇耐
（＊＊＊＊）技術上，其實係有機會蝕息，咪講過港息高過美息，但算啦，你又唔係早大額定期，又唔係做得長。你估你放港紙會拎到HIBOR三個月嘅息咩，咪天真
（＊＊＊＊＊）其實銀行搞到去金管局借錢，不一定係咩好大問題，可能只係有啲人做錯嘢（可能係我，或者我同事），計錯數或者四點鐘掛住食下午茶咁。當然一般都唔係咩好事啦下，驚動金管局噃，唔係幾好嘅。
美金轉台幣 在 美金狂漲！要不要換回台幣？兩派網友PTT吵翻 - 蕃新聞 的美食出口停車場
一名鄉民在PTT的八卦板上發文《美元現在可以換回來了嗎？》表示，過去自己在低點的時候有買一點美金，現在覺得美金漲幅升高，覺得「有賺一些」， ... ... <看更多>