拜拜4眼🤓 之 Smile手術篇(下）
（長文慎入‼️）
上篇講咗驗眼嘅過程：
https://www.facebook.com/1093479517378066/posts/3048211575238174/
依家到主菜啦😂唔好意思愈打愈長篇，所以執咗篇文幾耐吓先出得，要大家等咁耐唔好意思呀🙏🏻
做咗 #smile矯視 就2個星期啦，視力已經好返9成5，宜家講講手術過程同注意事項⚠️，最後再有啲問答環節⁉️，都係我問醫生嘅，問到我都覺得自己有啲煩呢😂好彩醫生好有耐性，真心覺得佢係好醫生👍🏻
手術前注意事項：
⚠️驗完眼後等一星期至做矯視，期間都唔可以戴con
⚠️出發前沖定涼洗埋頭，因為做完當日唔可以再沖涼洗頭
⚠️洗頭最好過兩三日先，涼就第二日可以沖，最緊要唔好俾水入到眼
⚠️食飽先出發😂
⚠️出發去做矯視時臉上唔好搽任個護膚品/化妝品，防曬都唔好搽
⚠️記得記得要戴太陽眼鏡，我自己另外戴多頂帽擋陽光
⚠️帶多個口罩，做完矯視後替換
⚠️最好有親友陪同，因為做完對眼會好矇
⚠️約咗13:30做手術，做完可以返屋企訓晏覺等對眼休養吓
⚠️就算返到屋企我都係全程戴住太陽眼鏡
⚠️做完矯視第二日要再去覆診，醫生會開假紙俾你
✳️矯視過程（16/4）
到咗眼科中心會再做多次驗眼，因為要睇下同上一個星期驗嘅度數有冇分別。
跟住就入醫生房見醫生，醫生會再同你check多次眼，同埋講多次佢會點做，佢同我講會做啲遠視。我有啲奇怪，乜唔係0度最好咩？佢話0度對眼會累啲，做-25至-50度等我睇遠嘢冇咁累，醫生其實係通知我唔係問我意見，不過就算問我意見我都唔識揀（之後發現做遠視係有原因的，一陣再講）。
之後姑娘就帶我去一間房放低個人物品入locker，唔駛除耳環，衫褲鞋都唔駛除，淨係要除口罩😷。姑娘幫我滴麻醉藥落眼，跟住幫我笠手術袍，手術帽，仲有套鞋套，同埋幫我消毒雙眼周圍，等一陣就帶我行去手術室。
去到手術室時我開始feel到對眼嘅周圍開始有啲麻，但唔會痕唔會痛，仲眨到眼，我覺得右眼麻醉感覺好似淺啲，我都有同姑娘講聲，佢話驗多次眼之後都會再滴多次麻醉藥，所以唔駛擔心。
喺手術室驗完眼之後再滴多次麻醉藥，醫生就話我唔好再講嘢，總之盡量保持唔好郁，只要用耳仔聽醫生指示就得，然後就訓上手術床，佢哋會俾張幾重嘅暖墊鋪上身（同開刀生仔個張暖墊一樣）。
我先做右眼，佢哋會用膠布貼實上下眼簾，等右眼合唔埋，另外左眼會用紗布蓋住，但左眼記得都要開住，會見到有啲透光，張床就會慢慢向前移，我對眼只需要向前望，直至到眼前有一支好似望遠鏡嘅機對正眼珠。
呢個時候對眼千祈唔可以郁，個支鏡會慢慢需向下吸住眼球，你會見到支鏡入面有個綠點，只要望實個綠點就得，醫生喺隔離就會講「望實綠點，係嗱望實，做得好好，慢慢你會見唔到綠點，係喇，個綠點愈來愈細喇，宜家全黑喇，做得好呀」
由開始望到綠點到眼前漆黑一片，時間大幾廿秒度，不過慢慢就會見到白光，因為左眼仲見到有啲透光，我就一路淨係望住左眼嘅燈光，呢個時候醫生就開始拎晶體出嚟，只要雙眼一直望住燈光就得喇，大約持續40幾秒度右眼就會見返眼前嘅手術機，醫生再喺右眼搽啲黃色嘅藥水，就完成右眼矯視。
跟住右眼仍然打開，用紗布蓋住，都係會透光嘅，就到左眼開始矯視，過程一模一樣，就完成smile矯視啦。
做完之後會發現眼前有層霧，醫生撕走返上下眼簾嘅膠布，姑娘扶我落手術床返去更衣室拎返個人物品同戴返口罩，醫生話我講手術非常成功，同埋話我雙眼都幾多淚水（即係好事？😂）。之後我就戴住太陽眼鏡坐喺大堂合埋眼等阿妹做矯視喇。
呢段時間我一直都合埋眼，同埋覺得擘大對眼會有啲累。等埋阿妹做完矯視之後大約3點度就離開，醫生同姑娘不厭其煩地同我哋講返屋企記得訓個晏覺，同埋俾咗支藥水我哋，係抗生素藥水嚟，晚上7點鐘起身滴，每4個鐘滴一次，訓著咗就唔駛滴，然後交埋錢就走得。
落到樓下，細佬車我哋返屋企，記得全程都要戴 #太陽眼鏡 呀（除咗熄燈瞓覺外）。呢一晚我喺娘家度瞓咗一晚，盡量都會合埋對眼休養，其實個陣 #視力 都已經有返8成，離遠3-4米都見到日曆啲數字了。
✳️第二日覆診（17/4）
起身個陣對眼已經清晰好多，不過仲係有少少矇，好似戴con戴耐咗對眼會矇咁，同埋好頭痛，忍唔住食咗止痛藥，可能瞓唔慣娘家張床🤦🏻♀️。當日上午11:30再返眼科中心覆診，記得都要戴太陽眼鏡呀🕶。
我哋先去驗眼，睇下度數變化，然後再見醫生，醫生話我宜家兩邊都有啲 #遠視，散光左眼75，右眼50，我話，咁即係冇變？！
佢話暫時係，但1個月內度數都會變，同埋因為做咗啲遠視，所以同散光抵銷咗，變咗左眼淨返3x度散光度。原來做遠視係為咗抵銷散光😱😱阿妹本身散光比較深，所以仲有百零度散光（其實都係同未做前一樣），跟住佢就俾多支黃色嘅消炎眼藥水俾我哋，都係4個鐘滴一次，之後就再約下個星期(24/4)返去覆診了。
頭4日我都少玩咗電話同電腦，但4日後我已經忍唔住煲返劇，但我會坐得遠啲咁睇，同埋睇一陣就停再停等對眼休息吓。
✳️1星期後覆診（24/4）
基本上已經有9成5清晰，不過總係覺得有少少戴con戴耐咗對眼有啲矇個種feel, 可能因為仲有散光嘅關係啦。驗完眼再見醫生，散光同遠視不變，傷口復原得好好，眼藥水只係需要滴返抗生素個支就得，一日滴兩次就可以。阿妹散光比較嚴重啲，聽醫生口吻有可能要再做多次😢希望3星期後會好啲啦。
跟住到自問自答⁉️
❓價錢係點？
第一次驗眼$9xx，矯視$23xxx，已包所有覆診/藥水錢，Total係$24xxx。
❓如果第一次驗眼話角膜穿咗窿唔做得點算？
醫生話可以先做補角膜手術，然後再做smile都得。
❓有冇二人同行優惠？
Sorry我呢間係冇嘅，出面好似有其他診所會有優惠，最緊要問身邊朋友睇下做得好唔好，唔好嘅俾半價我都唔會做啦🙅🏻♀️
❓幾多度近視/散光可以做？
1000度以下近視、散光400度以下可以做
❓做完手術對眼會唔會痛？
我同細妹都冇痛，只係對眼會有啲累，唔想擘大對眼咁。
（但細細妹做完話滴眼藥水會好痛，佢係另一間😢）
❓做完矯視後可以化眼妝嗎？
梗係唔好啦，醫生就話一星期內唔好化眼妝，驚化妝品唔小心入眼，引致傷口發炎，mask我都唔敢敷（雖然平時我都好少敷😂），洗面我都係用毛巾抹咋。
小小建議：做定紋眉/眼線/眼睫毛之後先做smile就夠晒方便啦😂
❓可以捽眼嗎？
醫生笑笑話盡量唔好啦，細細力都ok嘅。
❓散光點解冇變？
我都唔知點解，但醫生幫我做咗啲遠視，佢話用嚟減走啲散光。
另外聽過散光對第時老花都有用，可能因為咁所以醫生留返啲散光俾我？我都唔知🤦🏻♀️。
❓第時老花可唔可以再做smile/激光？
問過醫生，佢話唔建議，so far佢做過嘅客就算有老花都冇搵佢再做，不過第時如果再有新科技可能會有得搞嘅。
❓本身有 #飛蚊症，做完smile會唔會有改善？
係唔會改善嘅，大家要有心理準備😂
❓做完之後發現度數回復唔理想可以再做smile嗎？
如果度數有反彈可以做多次舊式lasik激光個隻矯視，醫生話基本上一個月後度數就定，但三個月後先會confirm度數有冇反彈。我個間一年內反彈可以免費做多次lasik, 細細妹個間就3年內可以免費做lasik
❓做咗smile有冇咩壞處？
其實係夜晚視力會弱少少，同埋望住啲街燈會有一層 #眩光 外，我諗唔到有咩壞處。
有啲人話做完會 #眼乾，我自己就ok, 可能本身眼水比較多。
❓幾時可以做運動？
醫生建議一星期後。
❓做完smile幾耐可以去游水？
醫生就話一個月後已經可以，我自己就唔搏喇，起碼3-6個月後先啦。
❓第時可以再做其他眼部手術嗎？例如 #白內障手術？
可以，因為佢係 #眼角膜手術，唔會影響其他眼部組織，只要第時同醫生講聲就可以。
❓可唔可以再戴大眼仔con?
唔建議，因為 #眼球弧度 變咗，最好問返自己醫生睇吓適唔適合會好啲。
❓如果個人特別緊張做手術，可以落麻醉藥令個人平靜啲呢？
醫生話冇方法，只可以調整自己心態，佢只會滴麻醉藥落眼，但唔會為客人打麻醉針。同埋如果打麻醉針有啲人可能會有啲手震/口震反應，反而會影響矯視過程。
#純分享
#諗到嘅都盡量寫晒出嚟
#大家如果仲有咩疑問可以留言
#三星期後我再覆診可以問問醫生
#我幾鍾意呢個醫生
#好有耐性解答我所有問題
#細細妹個醫生一輪咀講嘢唔俾我妹發問咁
#兩個醫生我都唔開名喇
#想要醫生資料就留言丫
#不過冇優惠㗎😂
#smile #矯視
三星期後我再覆診可以問問醫生 在 黎齊妙中醫診所- 《 不要試探你的中醫師》 林婆婆是我一位女 ... 的美食出口停車場
《 不要試探你的中醫師》 林婆婆是我一位女病人的媽媽，她患腰痛多年卻沒有徹底延醫治理。這天是她第二次到來求診。 " 婆婆，上次給你開的藥幫到你嗎 ... ... <看更多>