今日場波，精彩絕倫，暫時係總決賽最好睇嘅一場，而兩隊嘅拼博都抵讚。
成場波嘅發展，我唔詳細講，但我想講吓我對最後一個play嘅睇法。
好多球迷主要講緊三樣嘢：
1. 點解唔係LBJ射？
2. 點解要係做畀Danny Green射？
3. 大摩傳出界係最大罪人？
關於第1點，如果我做教練，我會想LBJ去做個中投。最後一擊有16.8秒，落後108:109，今日LBJ hot hand 40分9射6中三分全場超過七成命中率，而且作為球隊老大哥且”One of the all-time greatest”，我絕對願意同想佢射呢個最後一擊，就算佢最終炒粉，我唔覺得佢有失當，唯一佢唔應該射呢球嘅解釋，相信只有「太攰」呢個原因，除非佢主動要求話因為太攰而無力去射，咁無得講，但從呢個PLAY嘅設計，Vogel應該係做畀佢拎波，首選佢完成，次選係佢「回馬槍」傳畀空晒嘅Danny Green射，唔入嘅都預留咗時間搶進攻籃板補中 (可從LBJ未拖夠時間已經啟動可見)。我只可以講，LBJ希望用單擋換防唔成功後，選擇剷到咁深入嘅位置，我認為本身已經唔係最佳選擇，正如我前面所講，若果我係教練或隊友，我都會想LBJ以1 ON 1去TAKE呢個SHOT，除非喺三分線已經遇到進退兩難嘅兩人包夾被迫傳波，否則哪怕係一球FADEAWAY SHOT，都值得一博，入嘅話講一世，唔入嘅我都唔覺得有問題；
而另一個問題就嚟喇，剷入去引夾擊而回傳畀空晒嘅DG，就關乎第2個TALKING POINT。有人話，DG係季後賽生涯係56/133三分，有成42%，喺2013年時係NBA史上200球內第3準嘅球員。喂大佬呀，呢個數據明題唔適用於今年季後賽啦，本身係一個3D球員，既有經驗又SUPPOSE準繩，日日射十九幾球3分，逗住 $14,634,146美金一年，但全個季後賽表現貨不對辦，今年季後賽所有賽事三分係33.3%，上個SERIES對金塊都仲叫有3成，但去到總決賽就8/31得24.7%，以近況嚟計點都稱唔上準喇掛？就算今日未射最後一擊有2/4三分，咁LBJ 6/9、KCP有3/8、AD今場有傷都2/5加上上次入過有保證，咁點解會揀做畀DG呢？除非佢HOT HAND，否則我寧願會揀KCP，但其實本身就唔一定要射3分。另外以我角度，打波愈係高水平，就愈係要揀人傳，唔係下下空就要射，下下空就要傳畀某球員，正如KOBE MJ，有好多LAST SHOT其實係畀人包夾或者TOUGH SHOT，(Steve Kerr/ John Paxson是少有例外) 最終都出咗手，咁你會罵佢嗎？道理一樣，GOAT就應該與眾不同，LAST SHOT LBJ選擇傳畀空嘅隊友都算，但教練揀DG都絕對唔理想。
至於第3點，我覺得討論位最小，因為個突然性太大，大摩明顯諗唔到咁多，自己打又唔係，傳入去唔係差嘅想法，只係傳得差，而AD攞個位又唔太好，失誤收場當然可惜過射唔入，但都係嗰句，本身佢拎到都唔係as planned，只係失去咗個bonus而已。
撇除呢個爭議嘅16.4秒，兩隊其實都好多值得讚嘅地方，尤其係36歲嘅占士同只係休息咗49秒嘅JB，熱火追返2:3，最少可以睇多一場，球迷們一齊好好享受歷史時刻吧。
#NBAFINALS2020
#GAME6
