【電影吹水潭】
呢排都係睇舊戲多...《風雲群英會》Spartacus 、《烈血暴潮》Mississippi Burning 等等都係經典好戲。新戲方面，無乜戲好睇，更無乜戲好寫。有日聽電台，主持推介呢套Netflix嘅《愛情人形》Romance Doll，佢地話一開始以為係是枝嗰套《空氣人形》，睇睇吓變咗Noah Baumback嗰套《婚姻故事》；以為越來越激烈，點知又突然轉tone去到好似《在世界中心呼喚愛》、《情書》嘅日式純愛體驗；睇完套戲，先知原來係《字裏人間》。講到套戲咁多元素，好似好吸引咁，喺呢個新片荒嘅環境底下（我都未提到套戲嘅女主角係女神蒼井優），我梗係狗衝去睇啦！
就係咁，我又一次中咗伏。
最抵死嘅係，你又唔可以話兩位主持講錯。咁套戲係講成人公仔，一開始會聯想到《空氣人形》都唔出奇（利申：佢地講嗰幾套ref，唯獨呢套我係未睇）； 之後劇情講到兩夫妻鬧交，就聯想到《婚姻故事》，有少少牽強；後來兩公婆因為女主角發生咗一件事而和好，重拾愛情一齊渡過，咁又真係走純愛嘅；最後主角邁向「職人」之路，勉強都可以話有少少諗起《字》。
不過以上嘅分析，除咗好片面之外，更重要嘅係無論呢套《愛情人形》似A似B，咁又點？兩位主持呢次嘅「推介」係有意無意咁避開咗套戲本身究竟好唔好睇呢個問題。真係好狡猾，以後唔好信影評人講野。
的而且確，電影係有好多其他戲嘅影子，但係明顯呢啲影子係唔足以build up 到一套好睇感人嘅電影出黎。
（插之前，簡單講劇情：藝術系畢業生入咗成人公仔公廠做product design，遇上做model 女主角。兩人結婚後，老公掛住做野無理過老婆，直至幾年後老婆有事，老公先醒覺，對愛情定係對佢嘅事業都有好大影響同啟發。）
故事大概係咁，我拿拿臨由頭講起（劇透）：
1. 一開始男主角誤打誤撞入錯行，老套都算，仲要拍唔到呢個場口有咩戲劇性，既唔好笑，亦捉唔到任何衝突位，咁就浪費咗個開場。
2. 男女主角相會嘅時候，男主角同佢阿頭驚女主角唔肯答承借自己雙乳做模，就呃佢今次將會係用作製造醫療工具。成個過程明明有欺騙、有尷尬、亦有幽默成份，但係成場戲竟然要乜無乜，究竟編劇係點樣建立呢場戲，要佢地主角二人有個點樣嘅相識，原原全全係失敗。女主角離開，男主角上前追個女主角，然後順便示愛？！你寫一見鍾情，但前面畀個咁流嘅meet-cute 相遇我？！唔係嘛！
3. 好啦，飛晒拍拖，話咁快就結婚，話咁快就四年後，話咁快老公就唔理老婆。wait，咁快？點解會咁？原來一直都唔鍾意老婆？後悔？又唔似吖，起碼故事無交代。有外遇？有係有，但好明顯嗰個其實唔多關事（嗰段都寫得好差，不過我唔理喇）工作忙碌？就當你志願要做到「職人」，喺電影入面都係無講點解主角可以工作忙碌到連老婆都唔理（何況，工作忙碌似乎更係因為佢唔再對老婆有感情而逃避嘅理由，而非因為單單工作忙而令感情轉淡）。結果，觀眾又一次只係見到交代式嘅劇情發展，完全睇唔到背後因由。
4. 鬧交、出事、重修舊好、領悟，以至引發到工作上嘅突破，統統都係要夾硬扭男女主角嘅關係。搞唔掂喇，無彎轉喇，就加個病畀女主角，咁個男人咪知悔改囉。呢啲橋段真係幾時睇都令人覺得係個編劇懶同能力未到......
5. 其實我最睇唔明係個結局。「某程度上為咗紀念過身嘅老婆而啟發到自己設計個同老婆一樣樣嘅成人公仔作限量300隻發售」究竟係邊個天才諗嘅屎橋黎？有場戲仲要白痴到男主角見到兩分鐘內自己個老婆就賣晒出去而感到高興。唔係話一個設計師唔可以based on 自己老婆設計個成人公仔。但係...老婆話晒都係過身無耐，屍骨都未寒，你走黎玩啲咁嘅野，會唔會係重口味咗少少呢。我肯定，呢樣唔係「文化差異」，亦唔係我open-minded 與否，而係個故仔完全講唔通，無去嘗試合理化任何情節，只係喺「摯愛老婆離世」同埋「專注做成功職人，提昇自己」呢兩者搵個因果關係，就變得咁怪異，差到不得了。
最後重複多次，以後真係唔好信影評人講野。
