［職場倫理系列］大膽的愛，小心的偷。冇事咪冇事，有事就有事架啦
1. 花旗倫敦呢位仁兄，畀人炒咗（好似話只係停職，但分別不大）。原因？因為在公司飯堂唔畀錢。睇名似南亞人。Trade junk bond嘅，唔知係咪食junk food
2. 不過唔使擔心。人地球幾嘢一年（美金啦梗係），聽聞賠錢都賠七位數（美金啦梗係）。又，梗係公司賠畀佢啦。好似三十歲咋，很想要吧？
3. 道德塔利班派可能會話，犯規就係犯規，公司寫明，況且偷嘢不道德（有冇用過公司printer印自己嘢？台證？影印護照？）。另一派又可以話（特別係當你係畀人炒嗰個）公司涼薄，小題大做，我幫公司搵幾多幾多錢（但，冇撚出糧畀你？）。
4. Bloomberg 嘅 Matt Levin （https://bloom.bg/2vRcEer），以前在高盛做過，寫得仲有趣：拿一方面呢，trader偷嘢食，梗係壞現象啦。唔誠實呀，挑戰規則呀，追求風險呀，會偷公司曲奇餅嘅，做trade都會食個客價。但換著十年廿年前？掉轉喎，擔屎唔偷食嘅，請你把托咩，去做NGO啦。個trader唔會偷曲奇餅嘅唔好請呀，因為if you are not cheating you are not trying（呢句我加嘅），你冇畀女人兜巴星過證明你都未真係戀愛過（都係我加嘅），做乜請啲企定定排隊畀錢嘅聽話trader？
5. 當然，Matt Levin話，其實公司最想請嘅，係「會偷三文治但唔會畀人發現嘅」，畀人周到嘅就低手啦。
6. 另外，見到efinancial career (http://bit.ly/2v0NPfA)就話，其實應該係花紅拗唔掂數，就拎呢個藉口郁佢。而記住，作者有強調，其實呢，對於球球聲美金年薪嘅trader，一般公司真係懶理呢啲嘢，你搵到錢就得。況且，正常公司都唔會將呢啲嘢扯上咩專業操守個人誠信之類。不過就可能此人食相比較難睇，球幾嘢美金年薪都仲慳呢啲錢，一早畀人唱，唱到周街知，咁公司就有機會做嘢。所以真係寧比人知莫比人見。
7. 其實就冇話啱唔啱。呢啲咁嘅問題，好多公司都有。我未計你會上老廉嗰啲咩收回佣咁大件事，或者搞同事之類（即使對方自願，唔自願就更加可以坐牢拾肥皂）。但一般咩拎公司啲文具返屋企呀，打斧頭呀，空姐空少拎走機上啲嘢呀，古已有之，不分中外，唔使個個做聖人。「話時話，你睇我呢篇文時應該返緊工，公司有冇話你可以返工時間做自己嘢？」「有冇試過訂淘寶買埃瘋叫送上公司呀？」
8. 渣正嚟做？有人訂咗一百件西餅，但得九十九個客嚟，剩返一件應該點呀？唔好自己食呀。公司冇話畀同事架喎，記得keep 住佢，填張declaration form，報上compliance 呀（放在佢地枱面更好）。喂我點知件西餅會唔會成千銀呀？都係小心啲好。然後等compliance判斷下，使唔使切做三十二份分畀全公司，或者留去annual dinner 抽獎（講笑咋，唔好真係做呀，你公司compliance搵蛋糕掟你唔關我事）
9. 你見公司啲合約，好多都相當辣，你在公司時間做嘅所有嘢都係公司財產（又係噃），唔止，你用公司財產做嘅所有嘢都係公司財產。全部不能搬走架。（至於客戶名單呢啲更加敏感，真係會畀人告的，唔好試，當然賤格嘅同事會教到你點做）
10. 咁但，幾時又係，合約又一樣嘢，約定俗成又另一樣嘢。即係唔通公司數撚住你幾多點出去食飯幾多點返嚟咩（我知有公司真係會），冇話唔得，大家冇癮咯，同埋你只會請到啲廢人—除非你公司人工好高
11. 我都係鍾意我同朋友成日講嘅一句「冇事就冇事啦下，有事就有事架啦」。好似好廢，但值得你細心嗒下。真係的，好多嘢都係，「冇事就冇事」，但要搞你時就梗係可以好多嘢，足足由人格講到公司價值，由社會契約論到Michael Sandel 講到大陸仔在德國地鐵唔買飛畀全國永不錄用都有（你唔係信呢個故事嘛？）。
12. 實情呢，私人公司炒人，甚至唔使咩理由。不過有呢啲嘢周到你就好聽啲咁解。況且外國保護員工多啲，比較多要呢啲東西。香港啦喎，其實我好少聽有人拎公司文具返屋企畀人炒。
13. 當然，拎公司文具返屋企，就梗係偷嘢啦。所以公司真係大條道理可以炒你架。當然你可以整個反白眼嘅神情然後「噢葛」嘅。有能力嘅咪搵過份。例如呢位主角我相信都唔難，亦唔相信佢真係因為食飯唔畀錢畀人炒。咁但我就勸你，「噢葛」甚至「噢賣忽京葛」都可以，但最好唔好貼上網 — 因為雖然公司多餘，但畢竟呢，偷嘢都係唔啱架，好難辯得過去。最多你用小明邏輯，「隔離添個肥仔夠日日拎公司啲曲奇餅返屋企」，但一般嚟講，唔會令呀肥仔被炒嘅。況且肥仔被炒你都唔會好過啲。
14. 都係嗰句，冇嘢就冇嘢咯。咁當然你好巴閉嘅，就做好多嘢都冇人敢搞你。但又係嗰句：你真係以為公司會冇咗邊個唔得？Steve Jobs都畀人炒喎，你勁過佢？
15. 但當然另一派認為（其實都有道理），公司要炒你就炒你架啦，你日日擔屎唔偷食拎埋嘢（唔係屎）畀同事食都可以炒你。我估可能真係地區問題。香港就唔多保護員工嘅，鬼佬？我估可能怕個員工告，唯有整多啲罪，等你冇機會告公司。因為你偷嘢在先。「公司報警都仲得呀」「咩呀偷包糖唔係偷呀？」「你望下你份合約寫明你在公司打飛機啲精都係屬於公司架，唔好諗住拎出去賣」
16. 其實舊文都有講過，國泰空姐偷牛角包被警告（http://bit.ly/3bcgn6t）。當時個post好多人屌，但我依然覺得寫得不錯。最重要係呢幾段 ：
當然呢個世界幾時都潛規則，真係明喎，間間公司都係有呢啲嘢，「人人都係咁」「上手都係咁」「老細都係咁」。講真返公司食早餐在公司買平機票OT呃鐘呀呃交通費呀拎公司文具返公司呀，真係古今中外人人都做啦—但唔等於咁做係啱呀下
講到幾千個牛角包都未夠高層花紅，又其實係事實。但，標題講咗啦，歡迎來到現實世界，資本主義嘛，你見鬼佬公司一樣係咁。高層就當然做呢啲嘢都冇人理，大把人溝女啲飯錢甚至酒店錢都打落公司—直到你得罪人。而高層一樣冇得免疫，要搞你時直頭即炒，偷廁紙都可以有罪。
講真，真係唔順超嘅，轉工咯。唔係晦氣，而係，你去到第間公司，Let’s say好撚員工friendly嘅鬼佬公司，人地問你做乜轉工，你咪理直氣壯答佢：我上手間濕鳩公司咯，人工又低，我笠兩個牛角包佢話炒我喎，你話係咪離撚譜先？我相信貴公司唔會咁小家。睇下點？我祝你在新公司前程錦繡，you deserve better
講到尾都係豬，出晒汪鈴你都仲當公司死嘅，真係好難同情，你啲同事都未必同情你。都係嗰句，公司好多嘢都係，冇事就冇事，要渣正嚟做好多嘢可以搞死你。所以一係你就做到啲冇咁易比人搞嘅高層（但都唔係免疫，好高層一樣可以因為呢啲嘢畀人郁），一係就唔好得罪咁多人。如果係散仔嘅，就真係只能講句自己小心啲。呢啲嘢好少冇風漏出嚟，你完全唔知，冇人話你知，證明你冇乜朋友（http://bit.ly/2T1g9J3 到嗰日你先知被炒，你個人都幾失敗）。你知但唔理嘅，就貪爽中出，中招好難怪人。
