半天的轉變可以很大，城中話題已經由拳賽轉移到鄭司長的大腿。有人說，原來河馬著咗旗袍係咁樣。
雖然半天發生了很多事，但我依然在想著今天的早餐。
四方好友紛紛詢問，喂，Ms Yu 坐喺你隔離食早餐咩？
其實我食早餐嘅地方喺灣仔大王東街，咁我又不得不否認方圓十里內又真係有數唔到咁多間學校，Ms Yu 在附近吃早餐也不足為奇。
問題係，邊個係 Ms Yu？
有位身穿 dirty pink 上衣的女子在我十一點鐘位置係咁望住我，佢係最大嫌疑；其他嘅，唔係外國人就係師奶，可能性偏低。
「索唔索？」有人在群組問。
「姣底嗰啲囉，」我回憶著，「麻甩佬需要嘅嘢佢齊㗎。」
「咁你唔搭訕？」朋友 A。
「係囉，用你平時跌錢嗰招嘛。」朋友 B。佢所謂跌錢嗰招，絕對唔係我嗰招，而係佢自己經常用嗰招。即係，咦小姐你跌咗錢喎，嗰種無比低級招。
「都想搭㗎，但佢啤到咁行，我又有少許怕醜。」
「真係有啤咩？Ms Yu 喎，唔會咁猴擒吖。」朋友 C。
「可能佢真係屬猴呢 LOL。」朋友 D。
不過講真，去到 Ms Yu 嘅級數，真係唔知用邊招搭訕。尤其是對住啲寸寸貢嘅女人，我更加有過慘痛經歷。
同個女仔喺個飯局都傾咗一段時間，跟住飯後陪佢去的士站等車。其實去到嗰個位，都 feel 到自己好有機會，但人往往就是太有自信嗰陣，就會以為自己都係王家衛電影嘅男主角。
「你知唔知一剎那有幾耐？」我問她。
「唔知，」她好奇而深情。
「係十六份之一秒，你知唔知十六份之一秒可以做啲咩？」越靠越近。
「唔知，」她深情依舊，「不過我知道十七份之一秒可以做啲咩。」
「講嚟聽吓，」我用最溫柔的語調說。
伸你一腳。
心盲才會自大，自大源於無知。
