有線條命係留得低，我知，大家可能好希望呢個台有所作為，特別係新聞台做得更好！
不過，正如我星期二篇欄先講過，「電視業竟然可以喺過近十年收入冇增長，連通脹都跑輸，已經唔止係講緊一間機構做得好唔好嘅問題，而係成個行業萎縮ing。當電視業變咗雞肋，甚至可能搭沉船；同時你又聽到有商家想接貨搞電視，你會覺得呢啲商家係真係有心做呢行？定係另有企圖？」
今次有線易主，未出發先玩財技，大折讓質數供股，你冇30000股喺手，都冇可能供足，玩殘小股東。
更重要係，純官呢就⋯⋯一向眼光「奇準」。
你真係會對新股東心存希望？
#亞視2.0
#亞視永恆
By千頌C
有線寬頻今次透過供股「賣盤」，鄭家純和吳光正其實好毒辣，單刁亦都幾複雜。與多位財金界和傳媒界高手商討後，姑且在這裡借花敬佛。炒賣盤中伏個啲人，應該學月光寶盒嘅紫霞仙子話齋：「估中左個開頭但係估唔到個結局。」因為，極多小魔鬼在細節。
首先，有呢個條款：
「本公司將不會向合資格股東配發發售股份之任何碎股，零碎配額將向下取整至最接近之發售股份完整數目。該等零碎配額將進行匯集，並將作為未獲接納之發售股份處理，由包銷商包銷。」
即係話...
1) 每手1000股，3供5，供1666.66股。碎股冇得供，變只能供1000股...
2) 供完我有2手，共2000股....
3) 去到8月21日，更改買賣單位至10000股
4) 最後都係唔夠一手 lol 只得五分一
6) 應該最少是30手的倍數先唔會碎
碎股不受玩，美其名係杜絕碎股黨狙擊....其實係畀包銷商收多啲貨。
而呢單刁擺明係tailor-made for 包銷商，咁會唔會引發全購（GO）？今次有線申請咗清洗豁免。所以答案係唔會。
不過都有失敗例子，馬雲之前入主阿里健康（241，前身為中信21世紀），被裁定為反收購。
諗返起打工仔吳天海當日話唔再揼水畀有線，其實係苦肉計，目的只係殺價，想用一個好啲嘅價錢賣走有線。
用供股「賣殻」，一般都係殺人唔眨眼的細價股，財技專家渾水提點，例子有隆成金融（1225）、銀基集團（886）。
鄭家啱啱先完成新時代能源（166）嘅供股，驚喜一浪接一浪呢。
另外值得留意嘅係，何超瓊已經悄悄地離開咗永升。新主人係新世界（017）主席鄭家純，唔係雞排妹。聯想旗下弘毅投資仍然透過Hony Capital喺到。
另另外，有線寬頻（1097）呢間公司，係包埋免費電視牌照的，所以今次鄭家純一次過買晒有線、奇妙。
有人話純官傻仔，燒錢搞Media，其實幾億對佢嚟講，唔係咩錢。當試下買件玩具畀新世界，沾手傳媒業，爽一爽。
最後，鄭家純老豆「鄭裕彤」和邱達昌老豆「邱德根」，都曾經經營過「亞洲電視（ATV）」，當年彤叔於1988年與麗新掌舵人、「林伯」林百欣聯手，只玩了短短兩年多，取代邱德根全面執掌亞洲電視。朋友話，今次係ATV 2.0。
亞洲電視，直至永遠，阿門。
