最後一集「石垣之旅～day 4: fusaki beach、雞白湯拉麵、刺激到爆炸的小朋友天地BANNA PARK，encore 美崎牛燒肉」
黎到day4，其實都等如最後一日，因為day5係早機走～我前幾日已經介紹過～
今日我地終於成功早起，事關我地諗住食完個早餐就出發去玩水！10月嘅天氣早上至中午會熱，但之後就慢慢大風，所以我地一早去係無錯嘅～
fusaki beach
再次黎到fusaki hotel～朝早係有街邊空位泊車嘅，慳返泊車錢，非常好👍🏻
真係一讚呢間酒店嘅泳池非常靚（無影到）另外仲有個嬉水池，超啱刺激嘅大小朋友玩，有4條sir滑梯，同埋成日唔知幾時會被淋水！但係原來90cm以下唔玩得架🙊
落到沙灘，其實都仲係好大風，海水都係冰咁凍，貝貝又唔肯玩沙，踩到落沙又係勁崩潰😂所以坐咗陣同埋影咗啲相我地都走了😌
雞白湯拉麵
之後本來上網查咗間望住無敵大海景嘅西餐廳（st elmo)想食lunch，點知我地1點幾去到，已經話sold out😫 唯有轉場去試雞白湯拉麵🍜。我好似第一次食配雞肉嘅拉麵，以為普通野，點知一食落去勁surprise!超好味，啲雞肉勁滑勁淋，一啲都唔係我地平時食開嘅雞肉質感，個湯好清好香，非常好食，每食一舊肉我都忍唔住話好好味🤭
趁貝貝仲未醒，去咗birthday隔離間Chambre行街，佢係類似Log-on咁嘅鋪頭賣精品同埋女裝衫，都幾好行，想shopping嘅話可以去睇下。
BANNA PARK
貝貝醒咗，我地就出發去Banna park，一路揸車一路都好驚🙈雖然石垣地方周圍都好鄉下，但係條路係越行越荒蕪，同埋越揸越高，越揸越遠，仲經過好多墳🙈 好不容易終於揸到疑似入口...
其實我事前都做過下資料搜集，但我唔知咁偏僻，只係見過有人話唔好俾入口個停車場呃咗泊車，要上到北入口行見到sir滑梯先啱，但係我地揸黎揸去都搵唔到北入口，揸揸下又去咗展望台，四圍又無人又無車，勁無助！好似去咗香港啲郊野公園🤭好大好恐怖，條山路又斜到好似上緊飛鵝山咁。終於俾老公兜黎兜去，搵到個牌寫住子供樂場，有個千秋嘅圖案！原來唔駛隔硬搵北入口，好似係西同南入口都得，但要搵到個牌寫住子供樂場，咁就好快搵到！😴 明明沿途都唔見有人有車，但喺子供樂場嘅泊車位又有好多車，去到又有好多小朋友玩緊🙈所以果條山路真係好大好似迷宮，奉勸大家唔好等到太陽落山先走，黑蚊蚊應該仲恐怖！
講返個公園，真係好大，而且啲設施完全唔似係俾小朋友玩😂好想知道日本啲細路到底有幾接受到刺激😂 啲sir滑梯係大人玩都會覺得驚囉！又高又斜又恐怖！🤣真係好接受到刺激嘅小朋友先好帶佢去～我地都鼓起咗好耐勇氣先敢去sir個滑梯～同埋真係幾恐怖，好快。講真，貝貝黎呢度都無咩啱玩～佢樣樣都驚，千秋同搖搖板又唔肯玩，反而有條超高嘅sir滑梯，佢夠膽自己爬上去話要玩，望住個無敵風景，個樣好似好恐怖，但原來好流，sir極都好慢，成日都卡住咗，但貝貝就玩得好開心，成日追住要玩。仲有個爬到超高嘅野，貝貝又肯行，但呀媽我反而好驚，每行一步都有離心力～
玩到差唔多日落我地就走啦，今日貝貝掛住瞓覺同玩，其實全日無乜食過野🙊跟住我地今晚無book枱，諗住去食壽司郎，點知果度無野啱貝貝食，又要轉場，又無咩方向食咩，最後決定翻兜美崎牛燒肉🥰途中，貝貝又眼瞓又餓，恰住眼瞓不斷講：「食飯～食飯呀」但我地搵路不斷走黎走去😹每次紮醒就講：「食飯」😂😂😂 點知次次擘大眼都未有得食。
encore 美崎牛燒肉
終於到餐廳，貝貝又熟睡咗，煮好晒又叫極都唔醒，跟住我地係咁話食飯呀食飯呀～貝貝！佢終於肯醒😹😹跟住好開心：「食飯呀🤩」最後又係食咗勁多野！美崎牛真係好食好多
今次我地食dinner，啲set貴啲，今次叫咗10000yen嘅set，再散叫其他野食，白飯同湯都要散叫，我地試咗和牛壽司、腸仔、牛心、牛大腸（唔識燒，超韌，好難咬開，後尾燒到好熟就易咬啲）
之後果日就搭早機返香港嗱，介紹都去到呢度為止，之後等睇我post返啲搞笑video啦🤪
旅行後感：如果一家大細，第一次挑戰去旅行，又可以自駕遊，石垣同沖繩都係好地方，石垣好處係每個點與點之間都好近，唔係太多景點（雖然我都無去晒）可以好舒服咁周圍去，hea下悠閒下，唔駛趕行程趕得咁辛苦，但唔太適合0m-大概1y嘅小朋友，最好係行得走得，又可以食到大人野嘅小朋友，一黎好早機未必個個小朋友頂得順，同埋石垣無沖繩咁baby friendly，好多時都無咩換片地方，仲有唔係間間餐廳都有bb櫈，都有啲餐廳唔多想招呼小朋友。如果撞正落雨嘅話，石垣少好多野做添，無咩室內地方無咩街行，沖繩都話仲有好多室內地方可以去，例如水族館，shopping mall，所以大家可以好好考慮一下！❤️
1Y10M12D
——————————————
重溫：
「石垣旅行～飛機篇」～https://www.facebook.com/permalink.php?story_fbid=557784531648890&id=155831361844211&__tn__=-R
「石垣旅行～day1：美崎牛燒肉、入住art hotel、birthday、舟藏之里居酒屋，驚安Donki行街」～https://www.facebook.com/permalink.php?story_fbid=558567868237223&id=155831361844211&__tn__=-R
「石垣旅行～day2: 麵屋八重山style、Dolphin Fatasy親親海豚、公設市場買手信、食著名雞蛋布丁、石田屋品嚐石垣牛」～https://www.facebook.com/permalink.php?story_fbid=560364568057553&id=155831361844211&__tn__=-R
「石垣旅行～day3: Vanilla Deli食超juicy和牛漢堡、竹富島觀光：坐水牛車、踩單車、西棧橋，kondoi beach、fusaki beach 睇消失的日落、超好氣氛嘅居酒屋「一魚一會」，coco咖喱宵夜」～ https://www.facebook.com/permalink.php?story_fbid=561161031311240&id=155831361844211&__tn__=-R
「石垣之旅～day 4: fusaki beach、雞白湯拉麵、刺激到爆炸的小朋友天地BANNA PARK，encore 美崎牛燒肉」～https://www.facebook.com/permalink.php?story_fbid=562118027882207&id=155831361844211&__tn__=-R
FB: 貝貝Alice-小寶貝夢遊日記
IG:bowl_lam
記得讚好我地 Page 之餘，仲要 Set 做搶先看呀～
#貝貝Alice #90後媽媽 #香港媽媽 #新手媽媽 #新手爸爸 #育兒日記 #育兒生活
