細個去旅行，阿媽會話冇意義，嘥錢；出嚟做嘢之後去旅行，老細同上司又話冇意義，留低啲手尾要同事跟；然後又有城中名人話，成日去日本冇意義，難怪我哋買唔到樓。
我今次去英國旅行，先去海德公園睇天鵝hea咗半日，然後去牛津睇人畢業，跟住用咗HK$2200睇一場英超，見識咗熱刺嘅新白鹿徑球場。
我去咗平價扒房Flat Iron體驗，不過之後都有去名廚Gordon Ramsay嘅餐廳豪食Beef Wellington，去埋Primark買平衫，撞到阿仙奴球員再扮廠迷影咗張合照，真係唔好意思同佢講我啱啱睇完熱刺。（兩隊係北倫敦死敵）
想去蘇格蘭但係時間唔夾，臨時改去威爾斯卡迪夫，冇預計之下睇到梵高同埋莫奈嘅畫，之後去埋York，返倫敦學人睇The Phantom of the Opera，再用咗HK$1750睇咗場英格蘭足總盃決賽，發覺溫布萊球場隔離有個outlet，Jack Wills可以平過香港Bossini。
以上嘅一切一切，諗深一層又真係冇乜特別意義。
但係乜嘢先叫做有意義？
其實做你一直想做嘅事，be yourself，已經係最大嘅意義。
喺日本電影《奇跡》裡面有一句對白：「這世界上需要有一些沒有意義的事物存在。要是每件事都有意義的話，人是會窒息的。」
