［賣機位vs賣樓vs新股定價］睇下係一次過，定要玩加推咯
明報原文：快運環港遊不足兩小時售罄 1.5小時環迴上空 未計雜費票價388元起（https://bityl.co/3zYH）
TLDR：明報個圖實在好，一睇就知快運同廚叉定價好有競爭力。但係咪定得過低？咁就睇下之後仲加推到幾多了。但留意，頭啖湯嗰班人，有機會影響其他後來者嘅意慾。
1. 其實最初推呢啲「偽出國」「無目的地航班」 ，我都有啲質疑，有冇人走去坐架？台灣啲友就話啫，香港人個個未滿月都去咗幾次日本，邊會搵啲咁嘅嘢玩？
2. 不過我好快就修正我嘅諗法。首先係，我發現有啲朋友真係會去—記住，唔好當你自己嘅喜好係全世界，接觸下其他人。第二，其實同賣樓差不多，有好多策略，能不能夠一Q清枱/袋，仲有好多嘢影響。並唔係一句：「大把人爭住去」「邊有人咁低能」就下到結論
3. 首先當然係，價錢。明報呢個圖就非常之好，你一拍埋去，就知道快運388起嘅價，極之有競爭力。固然388好快搶晒，但我理解搶到最貴嗰啲都不過係1000頭，都仲係平過晒其他地方 —而，香港人好撚富貴的說！都話rule of thumb，香港人嘅人工係台灣人四倍（＊）。台灣千幾蚊賣到，即係香港應該幾千蚊都有人買。事實亦證明係咁，快運一出，兩個鐘就賣晒（https://fbook.cc/3HDz）—其實已經算耐，但好似係星期五放工，加上之前啲人未玩過，有啲疑問，否則可以更快
4. 後來到廚叉（香港航空）推（https://fbook.cc/3HDy），都係講緊一條友500蚊唔使，就更加有競爭力，半個鐘賣晒。香港人喎大佬，500蚊邊係錢？
5. 但仲有一點好重要，就係量。等於你賣樓唔會推晒五期幾十座出嚟炸死人（除非係以前長實），賣機位都係—至少而家情況係。都係試下水溫。加上仲要社交距離。快運同廚叉都係搵隻A320飛，平時坐滿都只係200人上下，今次賣嘅100個位多啲—點會唔爆？都話，成班機收嘅錢都可能只係十幾萬—大把人包起架機都得。型喎，成班空姐空少serve你一個，將架A320玩到變私人飛機咁！當然實際上唔會咁做啦，Michael Sandel話頭，Justice嘛，你有錢人食雲吞麵，係肯定可以一個人包起晒舖頭嗰一個鐘生意額呀，但你就咁行入去人地多數唔會睬你，有錢大晒咩
6. 咁當然仲有，公司搞啲花臣嘢都好重要嘅。正所謂，If a tree falls in a forest and no one is around to hear it, does it make a sound? 富貴不還鄉 如錦衣夜行。Freakonomics 話頭（其實唔係佢），冇咗Facebook Twitter Instagram，你估下少幾多人跑馬拉松？
7. 所以，你話啲水好掛住坐飛機？唔係咯，係要打卡刷存在感嘛。咁呢樣嘢好正常，冇乜好批評，反正你同我都係咁。但公司就要整啲嘢，令到佢地有存在感咯。拿，你嗰個香港至香港嘅登機閘口顯示，真係必影，唔影嘅你根本冇坐過呢班機。仲有個HKG- HKG嘅波丁趴時，廚叉就直頭搞到班機變852。呢啲，都係等你感覺良好啫。
8. 不過，似乎今次個玩法，冇得用里數去換？
9. 留意下坡國星航，就唔係玩SIN-SIN，但玩飛機食餐，飛都冇得你飛 —但收得仲貴喎（https://bityl.co/3zXd），頭等收你近四千銀港紙，經濟位都三舊水—而我幾肯定佢成本點都平過你要學香港咁飛架機上去！
10. 不過新航呢個東西，就可以用里數換—實情如果有里數今年（或下年）到期，都幾大鑊。今年 3月之後你已經practically 飛唔到，反正有剩，我估好多人唔介意拎嚟食飛機餐 （但好似啲航空公司有extend 到期日的，星航有冇就唔知了）
11. 但都話，呢類東西，當賣下廣告就得，但邊幫到生意呢。都話你呢啲機，成班都只係收到十萬港紙，你自己望下等於平時收入嘅幾多巴仙，都唔好同你計油錢之類。況且，玩唔得好多次的，我唔知個潛在市場有幾多人，照計唔止幾百人，但斷估你坐過一次就唔會再坐啦？頂多快運坐一次，廚叉坐一次，國泰坐一次，港龍又坐一次咁（會咁做嘅，必然畀人話你係飛機膠，或制服癖）（＊＊）
12. 咁當然可以係下次再搞幾班啦，吸啲未坐過嘅人坐—但又出現個小問題，呢啲嘢，行船爭解纜嘛。有一班人去咗，你之後再去嗰班，意慾就唔大了。都話最緊要係刷存在感，但你啲朋友個個去晒你先去，因住畀人留言串你：之前呀乜水咪貼過咯。
13. 呀重有，其實我唔知 Qantas嗰個好唔好賣，但見到我係怕怕的。貴都算，但你屈喺架機度7粒鐘，當你睇大煲礁睇烏魯魯都好，照計都幾惡頂。最後演變成上去訓覺，或者睇戲。
14. 寫寫下，搞到我都有啲想去添！可惜廚叉賣得太快，我寫得文嚟都賣晒了。
15. BTW，其實之前Patreon寫過，新股上市第一日升一兩倍，抽嘅好開心，但間公司應該係面黑黑的—因為，第一日就升一兩倍，咪即係投行定錯價？明明我隻嘢值100蚊你叫我50蚊招股？我集少好多資喎，當中嘅各種鬥智利力，Patreon寫過，亦因為咁，啲人要搞直接上市（https://bityl.co/3zY7）
16. 但賣樓就唔同，要做個勢嘛，梗係第一輪整得平，反應極好變城中熱話，然後加價加推。新股冇得咁玩的。
17. 機位呢？一半半。既然兩間都話咁快賣晒，即係定價太平啦？咁你下次可以加價。但都係上面講嘅嘢：畀人食咗頭啖湯，其他人仲有冇咁大意欲去？就有啲疑問了。到時又睇下點。
（＊）當然呢個適用於高人工嘅工作，咁基層員工台灣唔會係香港四份一嘅，會死人的。
（＊＊）非官方統計，雖然飛機膠同制服癖都男人多，但好少會兩樣一齊，「慢慢地就覺得有一樣吸引啲」
———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7
——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010
內容:
*軟件股IPO狂潮
*買平台股好過
*人民幣強勢買咩好?
本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145
