《一段感情係幾時死亡？大約就係…當我話「我瞓啦」，但其實我未瞓嘅時候》
「點呀，你仲唔求婚呀？」
問呢句嘅…係阿KEN。
「求咗，而家都分分鐘擺唔到酒啦？咁求嚟做咩？」
答呢句嘅，係阿強。
得唔到想要嘅答案，阿Ken自然唔放棄：
「屌，我個Friend上年結咗，今年都未擺酒啦。形式嚟嘅啫…」
面對言語上的進逼，阿強忽然大叫：
「哇，利記又落後喎。」
見佢刻意轉換話題，阿Ken亦都「識做」，未有追問。
而阿強…當然係「自己知自己事」。
點解唔求婚？
因為…佢最近…
講咗一個大話。
＝＝＝＝＝＝＝＝＝＝＝＝＝＝＝＝
手機嘅通訊App入面…有呢段對話。
1:31am
Fiona: 「我準備落床啦～～你又瞓未呀？明明你今日係咁呻攰。」
1:35am
阿強：「我都瞓啦。」
1:36am
Fiona: 「好啦,Good Night.」
1:36am
阿強：「Night night..」
＝＝＝＝＝＝＝＝＝＝＝＝
可是，
阿強其實未瞓。
唔係瞓唔著，
而係由始自終，佢都無打算咁早瞓。
無錯，佢講咗大話。
阿強同Fiona拍咗拖3年，關係穩定。
結婚對雙方嚟講，都係計劃之內。
不過呢個大話，令阿強重新思考一遍…
因為結婚的確唔些係一個「形式」，
更加係一個Step，Step to 「一齊住」。
＝＝＝＝＝＝＝＝
阿強問自己：『點解唔直接講唔瞓』
＝＝＝＝＝＝＝＝
好簡單，皆因預視到講「唔瞓」嘅結果。
就係
「吓，咁你今日又係咁話攰？攰又唔瞓。」
「咁你唔瞓，有咩做咁緊要呀…」
兩個問題，都會引伸更多問題。
首先，好哲學地解釋，有時「好攰」只係口頭禪。
等於你喺Pantry撞到個同事，
成日開口就講「唉，好眼瞓。」
其實…講下㗎咋，無好大含意。
同埋，人生本來就是攰；但人生，可不只有睡覺，對不對？
第二，有咩做咁緊要…
問題正正就係…「唔緊要」。
對Fiona嚟講「唔緊要」，
但對阿強嚟講「緊要」。
係咩？
打機囉。
＝＝＝＝＝＝＝＝
阿強問自己：『點解寧願講大話，都唔想解釋』
＝＝＝＝＝＝＝＝
點解預視到講「唔瞓」嘅結果？
因為呢段「唔瞓」同「點解唔瞓」嘅戲碼，
阿強已經試過無數次。
咁幾多次係「無數次」？
只要滿足以下條件，就叫「無數次」。
1)知道對方點問
2)都知道自己應該點答。
一再重覆嘅事，男人總係想避免。
＝＝＝＝＝＝＝＝
最後，阿強3:44am先瞓。
但依舊8:00am醒。
喺刷牙嘅時候，望住鏡入面嘅自己…
佢開始諗，呢個「大話」…
係咪就係…一段感情死亡嘅證明？
自己決定咗「呃佢」…
係咪就係…一段關係變質嘅實例？
到兩個人一齊住時…
仲點呃？
咁…阿強就想像唔到…將來會係點。
於是將關係保留於「現在」，不要跨過去未來。
時間8:36am。
呢一刻，阿強明白到…將來的確是想像唔到。
Fiona入咗醫院。
＝＝＝＝＝＝＝＝
9:00am
阿強頭髮亂亂，一班護士嚟唔切細問原由，佢已經跑入病房。
阿強：「你唔係話個胃好返好多咩？做咩搞到入醫院。」
Fiona：「一時時啦…呢排大壓力…諗住忍到…點知…」
阿強：「咁我日日問你有冇唔舒服，你又話狀態幾好？」
Fiona：「…咁…見你成日都話攰…無謂講啦，同埋我講咗嘅話，都估到你點答…」
阿強：「吓…我會點答…？」
Fiona：「一係就『唔好理班同事，掟晒畀佢哋做，你唔好攬上身』；一係就『辭職，唔好做呢份西工』…其實…都無咩討論空間…又解決唔到個問題…」
阿強：「…」
Fiona：「而我會點答返你…你都知啦…Sorry呀…唔想搞到你都覺得煩厭…所以咪…」
呢句Sorry…格外刺耳。
因為…Fiona根本不需要道歉。
這種謊言，阿強自己也有。原來彼此都有。
而Fiona甚至比他更為體貼。
在感情世界上，
接受道歉的一方，往往卻是最應該道歉的人。
於是，阿強打斷咗佢嘅說話：
「其實…我尋日話瞓…但…其實我無瞓…」
這個坦白來得突然，令Fiona笑一笑，當然…一笑，胃就感到痛…
可是她還是笑了：
「知你啦…去打機啦實係。」
阿強：
「你又知？」
Fiona：「你足足Online咗4分鐘先答到一句『我都瞓』…睇怕都唔願瞓囉。哈哈，唔多唔少，都Sense到嘅。」
突然，Fiona輕輕捉住阿強隻手：
「如果我哋繼續一齊落去…大約仲會有…無數無數咁多個大話 會出現。有啲係善意嘅…亦有啲係自私嘅。
始終最清楚自己嘅，只有自己嘛。你呀，唔好自己諗得太複雜，OK？」
阿強諗咗諗…點點頭：
「不過，可唔可以應承我…」
Fiona：「嫁畀你？？」
呢次到阿強大笑了：
「唔係呀！呢個會嘅，遲啲先…因為…都要買戒指㗎…我係想講…
應承我一件事。
如果有一日…你有事想呃我嘅，記住呃我一世。」
Fiona：「咁如果我答你『好』，但呢一句本身就係呃你呢？」
阿強：「無所謂，因為呢個係…我對你最大嘅信任。」
全白色的紙張，存在。
但在情感世界中，不存在。
總要增添不同色彩，那管像是一點點污跡，才算是一幅有故事的畫。
兩小口子相對傻笑。
但這個女人…突然面色一沉…
Fiona：「但有樣嘢…我仲想同你講…」
阿強冒一冒汗：「係…咩事…」
Fiona：
「你…唔記得帶口罩…」
阿強：「OH…」
IG: cheungson88
https://www.instagram.com/cheungson88/
（很少人Follow的acc，有時說說生活事）
MeWe：張晨
https://mewe.com/p/張晨
P.s. 用app有機會彈app…可搜尋「Cheungson」
