《如何煲美劇而不靠老翻》(非廣告)
原來HBO有得點播睇GOTs，WESTWORLD，二話不說即時申請。
有冇人呢刻心入面OS係，「下唔駛架！XX網有得睇」？
我當然知道。但個D非法網睇，通常都有幾個問題，字幕翻譯、畫質、Frame Rate、下載速度。我對睇戲劇還是有要求的。
可能你下一句OS就係，「你大把錢梗係XYZ，我窮咪睇老翻囉。」其實如果你真係窮到睇套劇都俾唔起/想慳返，正確做法係應該唔好睇、克制自己。
我唔係道德魔人，我都有睇老翻。通常係我真係搵過碟舖無碟賣、apple andriod冇得租，我先會考慮去深水埗買老翻或者BT。有人同我講大部人都會睇老翻，呢個算係「灰色地帶」。其實我覺得一啲唔灰，偷就係偷。我同你都會錯，好多人都會錯，唔等於個樣嘢就啱。
錯還錯，起碼唔好自我漂白。
我見過有個Page叫「贏馬」，大刺刺地叫人Like佢，佢會定期upload唔同嘅電影片段，甚至見過某導演Share返自己套戲！如果第日有電影宣傳會搵返呢D Page落廣告，「因為佢多人睇嘛」，絕對唔出奇。見住啲人睇完非法Source會多謝Uploader，會同返主演嘅我講，我就發現好多人真係已經錯到唔知錯。
有冇諗過其實唔駛向惡勢力低頭？你套戲其實唔駛靠個啲Source宣傳？你想睇嘅劇唔駛靠個啲Source上載？可能我地都唔幫襯佢，你拍套戲票房會高啲，你想睇嘅劇電視台會買？
諗返轉頭，其實見過幾次HBO賣廣告，但個種老正TVC會令人本能地忽視，你會以為仲係以往嘅「機頂盒」Channel，以為要申請、要填表、要預約、要師傅上嚟裝個啲。事實係HBO Go係同Netflix一樣，有信用卡即時申請即時down個app就睇得，如有smart TV仲可Chromecast電視睇。但呢點就關乎到唔識賣廣告的問題，又是另外的千字文。
做人嘅嘢，通常都係燒到自己先識痛。當然我會係度勸你支持正版係因為(遲早)燒到我，但唔等於我講嘢係錯。
P.S.我唔係大把錢。
