[膠談.01] 「不一樣」的花姐
前提︰
[#膠談] 係 #膠兄 會搵電視圈嘅台前幕後做專訪，而第一個受訪問嘅人就係佢︰
《Good Night Show全民造星》除咗令大家記得有99個仔仔，仲有一個人令到大家記得，就係花姐。近期，亦同Error一齊主持《花姐Error遊》大獲好評。到底呢個節目花姐又點睇呢？ 嚟緊Error又有咩發展？新一季《全民造星》又係點呢？透過呢次訪問花姐同我哋講！
Q︰膠兄
F︰花姐
Q︰由原本係viutv節目監製，身份轉變為Mirror同Error經理人，當中感覺又係點呢?
F︰其實我仍然係節目監製，但產量就會畀以前少，可能而家真係會係一年一個或兩個節目係我監製。
而轉咗做經理人嘅感覺係覺得好有壓力，因為成40歲人先學「新嘅嘢」，而且因為自己性格問題好怕「溝通」，因為做經理人就係要同多方面溝通。我好驚自己做錯事情累到16個仔仔（即Mirror同Error）嘅發展，所以其實做經理人都有壓力。
Q2. 喺《花姐Error遊》節目入面要挑戰咁多事情，你認為邊件事情令你到而家都最難忘同點解呢?
F︰對我最難忘會係「跳笨豬Jump」個集。最初我以為自己唔使跳，因為以為Poki會跳落去，咁我都叫有個「藉口」話︰Poki跳咗都有個節目效果，咁我唔使跳落去啦。突然間，相信觀眾都有睇，Poki跳唔到，跟住好似節目上咁講︰為節目效果所以跳落去。但其實當時我好驚，因為知道已經冇彎轉，而且我真係有「高血壓」，當日仲要冇食到藥。所以行埋去其實真係好驚
Q. 喺第11集「大阪瘋狂旅程」中，節目接近尾聲有提及過︰「靜坐」呢個環節引發起同製作組嘅「磨擦」。例如︰所構思嘅環節有冇問題、擔心節目上唔好睇。當節目出街後，連登討論區、viutv facebook都大獲好評。對你而家回頭睇返節目，你認為有邊啲環節做得好、邊啲環節理應要改善呢?
F︰今次《花姐Error遊》其實係「估計以外」，因為我好驚抄或用返舊橋，好驚內容重覆，又或者抄返自己《真PK》啲橋。
今次我除咗係監製，仲要係主持。咁我就決定畀導演阿Mike同其他人去度個節目，只少阿Mike係知道我條底線去邊到。因為如果我繼續落手去做，我自己都好驚自己年齡同睇嘅觀眾年齡唔同時，會覺得啲嘢唔好睇或者Out。
但今次節目係令我有領會到有時真係要放手畀導演佢哋試下，畀佢哋試下話事。因為可能佢哋仲細個，我有時都未必接受到。但播出後，觀眾又好鍾意，所以我話今鋪我「輸」。
但如果有咩要改善，我會認為Error介紹遊遊Items個Part可以改善，因為可以介紹好多好玩好好嘅地方畀觀眾（唔係話而家唔好，只係如果有得再改善）。
所以今次整個節目，我真係學到好多嘢。
(膠兄︰最鍾意睇炸生Bear，因為好鍾意花姐你講一句: 「呢組人就係會認真做無聊嘢」)
花姐續︰哈哈！呢個真係好笑。其實炸個下我都覺得冇嘢，但我都即刻同魯生*講。魯生都話冇嘢跟住哈哈笑。而令大家估唔到就係因為「炸生Bear」而令到生Bear出咗名，因為好多人都唔知呢隻熊係叫「生Bear」。而呢一炸就令到佢而家好多人知道佢叫「生Bear」，都係一件估唔到嘅事。
*魯庭暉先生係 viutv董事總經理（即台長）
Q. 令我 #膠兄 最感動其中一個位係︰「希望阿仔見到呢個節目，唔會覺得阿花係咁廢/ 冇用」，節目差不多播完時，阿仔有冇改變呢個諗法定係仍然覺得花姐「好out」?
F︰其實阿仔所講嘅「冇用」並唔係指節目上個啲「冇用」。我個仔都係成熟，佢會同我傾計，佢話︰媽咪，我指嘅係屋企上照顧嗰啲。你玩呢啲我都好欣賞你，甚至覺得好好，，因為我媽咪都會玩呢啲。
原來一直都係我自己嘅「誤解」，而家個感覺就好似同佢變咗為「朋友」同佢傾計多啲，溝通多啲
（膠兄︰咁可以同阿仔變成好朋友都係一件好事喎！）
花姐續︰係一件好事，我冇講係一件壞事。哈哈，只不過我始終都係想做一個好媽媽嘅角色多啲
Q. 「測試專員」又係令到大家好喜愛嘅一個角色。而且花姐其他作品當中都會有呢一類型角色令到大家鍾意，例如︰「真PK」嘅大隻佬、「全民造星」嘅旁白君。到底當中係點樣構思呢一啲角色呢?
F︰其實都有關我哋「請人」事，因為我哋組人度橋會係hehe haha咁樣度橋。因為當大家做嘢都好玩得，好自然令大家投入度亦會高咗，工作人員就會做得更好。而每個節目都有「幕後」參加，係因為佢哋係更加了解個節目需要啲咩。
例如︰《真PK》嘅大隻佬，原先我哋係搵咗一個大隻佬嚟試Game，試嘅時候好似差咁啲嘢，後尾搵返我哋導演阿包嚟試，就明白原來真正個個大隻佬唔明我哋做緊咩、玩得唔夠放。所以最後《真PK》都係搵阿包嚟做大隻佬
跟住到《全民造星》嘅旁白君(文卓森)，因為旁白君之前份工係DJ，而且佢把聲又得喎。同埋佢係了解《全民造星》嘅參賽者同埋整個過程，所以搵佢做旁白可以更加到肉。
去到今次《花姐Error遊》搵嚟「測試專員」係因為覺得「自己人」做呢件事會好好玩 (導演阿Mike係其中一個提議咁做)，「專員」其實喺《林說金曲》已經出過場，當時大家都話佢好好笑。(點解覺得佢好笑嘅?) 唔知呀，你見到佢個樣加埋啲動作就覺得係好正好笑，但可惜係「專員」而家已經冇再做viutv。
Q. 嚟緊Error又會有咩發展呢? Error會唔會繼續唱歌畀大家聽呀?
F︰Error係會繼續唱歌，我哋都一直搵緊合適嘅歌畀佢哋唱。嚟緊我哋都籌備緊佢哋10月嘅Talk Show，而個段日子左右亦會出佢哋嘅EP。同埋Error亦會有電視節目。大家記得支持佢哋呀！
（膠兄︰有人建議過做《花姐Error香港遊》呢? 會唔會係呢個呢?）
花姐續︰哈哈！佢哋應該會繼續「遊」，但下一次就唔會係我「花姐」同佢哋幕前「遊」，應該會係佢哋挑戰「其他人」(指緊藝人)同佢哋一齊「遊」。
Q. 喺《Viutv 2019》入面提及會繼續做《Good Night Show 全民造星2》，可唔可以透露少少內容，到底係會繼續做男版定係女版呢? 花姐又會唔會繼續擔任節目監製呀? 如果繼續由花姐擔任監製，節目上又會唔會有啲咩唔同呢?
F︰如果係我花姐監製就一定會做男仔，如果做女仔就未必會叫《全民造星》就可能改過第二個名。但由於好多事情都唔能夠公開住，只可以同大家講聲，新一季《全民造星》好快同大家見面！
後記︰
#膠兄 一直都好想做人物訪問，但自己覺得未夠功力去做或寫訪問。所以一直都係點評電視節目，結果機緣巧合膽粗粗問 花姐 可唔可以做一次電話人物專訪，首先要感謝花姐提供呢次機會畀 #膠兄，亦感謝佢好有耐性睇咗我千字文問題，如果以下內容 花姐睇到唔滿意，可以同 #膠兄 提出，即刻改！
#膠兄 揀選封面呢張相係想講花姐其實都識笑，因為喺《全民造星》經常都黑面，而令 #膠兄 印象最深刻就係B組差唔多畀人Foul晒，花姐都忍唔住流眼淚個場面，而今次《花姐Error遊》就見到花姐好多場面係笑，兩個情況都係「不一樣」嘅花姐，所以以呢個標題同圖為今次「膠談」主題。今次 #膠兄 先揀花姐笑住講嘢作封面。如果花姐唔鍾意，膠兄向你講聲抱歉抱歉。
再次感謝花姐，雖然係電話溝通，但感受到花姐你真係好錫Mirror同Error，而且希望下一次同製作組有更出色嘅節目畀觀眾欣賞！
#Mirror同Error畀心機唔好令花姐失望
#其實膠兄打畀花姐好驚因為驚佢會鬧我
#但同花姐成個電話訪問都好輕鬆佢真係好好人
#大家嚟緊想睇我膠兄訪問邊個呢
Ahfa Wong ERROR MIRROR ViuTV
=========================
Instagram：https://www.instagram.com/todui9atvshow/
Facebook：做乜膠睇電視
炸 生bear 魯 生 在 熊出沒注意！解構新員工生Bear 身世之謎！ - YouTube 的美食出口停車場
立即訂閱ViuTV YouTube➔ http://bit.ly/2a8lbLu ViuTV Facebook➔ https://www.facebook.com/ViuTV.hk/ ViuTV Instagram➔ viutv ViuTV 官方網頁➔ ... ... <看更多>