本應今日有兩套戲可揀,我自己係比較想睇1974年嘅《歌廳》Cabaret,除咗因為入選美國電影學會AFI百年百大電影、獲得十項奧斯卡提名而得到其中八個獎之外,以威瑪時代做背景亦深得我心。但由於放映時間實在太夜,唯有轉睇1954年嘅《星海浮沈錄》A Star is Born。
睇前知道套戲成3個鐘,為防眼訓特別買咗盒爆谷入去;點知歌舞片其實真係唔係幾好意思食爆谷,結果無乜點食反而倒到成地都係堅係後悔。不過喜出望外嘅係,除咗因為我自己對歌舞片段無乜興趣而訓咗一陣之外,全片基本上都係好精彩,三個鐘到尾一氣呵成一啲都唔悶。
《星海浮沈錄》其實故事好公式化(唔係科幻片……),講緊一個不羈男明星Norman Maine睇中咗寂寂無名嘅女主角Esther Blodgett潛質,最終響佢極力推薦之下終於一舉成名,而Esther Blodgett亦因此愛上Norman Maine結婚。但係當Esther Blodgett灸手可熱,連奧斯卡都攞埋之際,Norman Maine卻日漸黯淡,最終更加酗酒墮落。而當佢知道現實上只會成為女主角嘅負累之後,決定跳海自殺。
雖然老土,我全場仍然睇得好投入,點解呢?首先男主角因為欣賞女主角天份而極力提拔佢,但當女主角才能超越佢果刻果種矛盾心境,我係好能體會;唔一定要係愛人、甚至係異性,但即使講到自己點豁達、點識英雄重英雄,所謂文人相輕,果種羨慕又妒忌嘅心態仍然係難糾撇除嘅。尤其係女主角因為呢種知遇之恩而愛上男主角,然後反而成為男主角嘅心理負擔,最終迫到自殺,果種心碎嘅感覺真係好深刻。
除此之外,演員演得好好當然係另一關鍵因素。之前《新聞導火線》吳孟達不過整幾個痴線樣就話佢應該攞金像獎又乜又物,真係覺得而家香港觀眾對演員演技要求真係低咗好多。《星海浮沈錄》入面一個Judy Garland、一個James Mason真係勁到癲。James Mason由一開始做個CHOK到爆嘅不羈型男,慢慢因為從影生涯結束而感到不知所措,到最後變成一個潦倒廢人,由好很型變到唔很型,成個轉變都非常自然,唔會好似劉華謝檸檬果啲,點折墮都不忘CHOK番個樣。
至於Judy Garland,老實講佢比起其他荷里活明星真係麻麻地靚,仲要上鏡感覺塊面啲肉已有少少鬆(拍戲果陣佢32歲),但佢要完成嘅任務比James Mason更艱鉅。響演方面,佢已可以同男主角並駕齊驅:由一開始只能係低層掙扎嘅新人歌手,慢慢冒起直到成為超級鉅星──戲入面最後一個Shoot,真係完全表達果A Star is Born果種逼力,真係唔怪之得佢同James Mason可以雙雙奪得金球影后影帝。
但更厲害嘅事仲響後面:就係要唱兼跳埋。正如之前所講,我對歌舞片段其實係好抗拒,而且亦唔鍾意佢果隻扯盡丹田爆出黎果種唱腔,但無可否認,Judy Garland真係唱得好好。然後仲有幾幕佢擔起場戲之餘仲要跳埋舞,雖然舞技相比起歌喉黎講仲係爭啲,但一個又演得、又唱得、又跳得、而三樣都做得咁好嘅演員,真係無乜得再挑剔。
《星海浮沈錄》仲有一個優點,就係當年啲場境、服裝、大場面都做得非常出色,相比起黎早排「復古」嘅《Carol》雖然都做得好好,同當年堅係1950年代嘅時裝歌舞片比,就始終爭咁一班。不過美中不足嘅係,有段劇情竟然只係用一堆硬照加旁白帶過,我唔知算係一種新潮拍攝手法定係預算問題,但感覺係非常突兀,睇得一啲都唔舒服,算係美中不足之處。但總體黎講,而家睇番呢套經典,我唔會話佢完全無out到,不過論精彩,就好過好多而家所謂好戲多多聲。
當一個奧斯卡都攞唔倒嘅《星海浮沈錄》都咁好睇,片皇《Cabaret》仲得了嘅?真係要諗方法Download睇先。
Search