一早已看穿中國人個肺嘅2000 年B級動作片——《致命英雄》
近排Netflix唔知點解上返李連杰進軍荷里活初期嘅兩套戲：《同盜一擊》同埋《致命英雄》。尋晚睇返《致命英雄》，覺得佢比《三夫》更加多政治「隱」喻，相當有意思。
《致命英雄》故事：李連杰仆街老豆因為要逃避紅衛兵而走佬去香港，同時留低李連杰同佢細佬阿寶，後尾兩兄弟一齊偷渡來港與父相認，相認後李連杰唔知點解要替父頂罪入獄，將細佬阿寶交托畀老豆。後老豆帶寶去美國發展黑社會事業，同黑人幫會50/50瓜分紐約。跟住有一日阿寶畀人打死，李連杰喺監獄一拳超人以一敵千逃獄，再大模廝樣搭飛機去美國追凶，(偷)揸的士時唔小心識到黑人幫會大佬個女Aaliyah(現實中2001年墜機身亡的黑人女歌手)，李連杰一路打美式足球一路溝靚女，一路跳HipHop一路追尋真相，終於發現佢老豆竟然係殺阿寶嘅凶手，老豆自白時，理由竟然係：「阿寶他知得太多了，早晚會累死我們。」
《致命英雄》入面只有一個白人，就係同時同黑人、中國人做生意想攞佢哋著數嘅古惑生意佬。戲入面黑人大佬有點笨，黑人大佬副手有點奸，但相比起中國人，就只係仆街嘅皮毛。李連杰老豆為咗做皇帝，唔單只殺子，仲呃鳩幫會其他長老，製造「黑人搞事」嘅錯覺，順手將其他長老放入劏豬雪房一一KO，後尾李連杰殺到，同Aaliyah查到好多嘢係中國人做的，去質問佢老豆時，佢個仆街老豆仲講出非常之熟口熟面嘅「陰謀論」同「捉鬼論」：
中國人：
「黑人大佬將佢自己嘅能力計算得太高喇！」
「怎麼可能？一定係黑人安排咗啲唔關事嘅中國人做嘢，故意製造中國人自相殘殺嘅假像。」
「你要小心黑人大佬個女！唔好做傻仔呀，小心「美人計」呀！」
「我唔想我最後呢個仔都冇埋呀！」
後尾李連杰KO咗殺阿寶嘅打手，再去搵佢老豆，佢老豆仲話：「咩呀，你而家想殺老豆呀？」
做中國人後代，知得太多會死，明明自己殺子，人哋反抗就話人殺父；總之就係「陰謀論」同「捉鬼論」滿天飛，但萬變不離其宗：提出「陰謀論」同「捉鬼論」嘅人，自己就係鬼。
套戲其實幾好睇，但結局非常唔真實：仆街老豆畀李連杰屌咗幾句，竟然自殺(明明佢手上有槍，李連杰走嘅時候背住佢)，李連杰同靚女黑人殺咗好多人之後相擁，喺美國差佬嘅保護之下肩並肩離去。
首先現實世界嘅仆街根本唔會自殺，佢會攞起槍隊林行緊出門口嘅李連杰，然後就算佢冇殺李連杰，佢都唔會自殺，佢只會厚住臉皮呃埋自己繼續放風屈鳩其他人，繼續做皇帝。而李連杰同靚女會雙雙入獄，因為大家都知，現實世界並冇呢種「殺壞人就係啱」嘅電影公義。
